Devine Rooi

MERWEVILLE. – Die graad 4- en graad 5-leerders van Laerskool Merweville, het 'n leersame uitstappie na Karoo Aquaponics onderneem, waar hulle eerstehands oor moderne boerderymetodes en gesonde voedselproduksie kon leer.

Die besoek het die jong leerders se kurrikulum perfek aangevul. Die graad 4’s het as deel van hul aardrykskundelesse die geleentheid gekry om meer oor boerderypraktyke te werk, terwyl die graad 5’s gesien het hoe gesonde kos groei, wat direk aansluit by hul lewensvaardigheidsonderwerpe.

Die uitstappie na die akwaponika-plaas, wat die beginsels van visboerdery en die kweek van plante kombineer, het 'n groot indruk op die skoliere gelaat en het gelei tot lewendige gesprekke in die klas oor die volhoubaarheid en waarde van sulke boerderymetodes. Die besoek het weereens die belangrikheid van praktiese leer buite die klaskamer beklemtoon.